वाढदिवसाचा जल्लोष टाळून शेतकऱ्यांच्या मदतीचा संकल्प!*



 *नगरसेविका अश्विनीताई रुपेश निकोडे यांच्याकडून मुख्यमंत्री सहाय्यता निधीस २१ हजारांचा धनादेश; सामाजिक बांधिलकीचा दिला परिचय* 

 












रवि वाळके/दे दणका न्यूज मूल

वाढदिवस म्हटला की बॅनरबाजी, जाहिरातबाजी आणि जल्लोषावर मोठ्या प्रमाणात खर्च करण्याची प्रथा दिसून येते. मात्र, या प्रथेला फाटा देत वाढदिवसाचा अनावश्यक खर्च टाळून संकटग्रस्त शेतकऱ्यांच्या मदतीसाठी आर्थिक योगदान देण्याचा आदर्श उपक्रम मूल नगरपरिषदेच्या प्रभाग क्रमांक २ च्या नगरसेविका सौ. अश्विनीताई रुपेश निकोडे यांनी राबविला. आपल्या वाढदिवसाचे औचित्य साधून त्यांनी दुष्काळग्रस्त व पूरग्रस्त शेतकऱ्यांच्या मदतीसाठी मुख्यमंत्री सहाय्यता निधीला २१ हजार रुपयांचा धनादेश सुपूर्द केला.

बुधवार, दि. २१ ऑक्टोबर रोजी आमदार सुधीरभाऊ मुनगंटीवार आणि चंद्रपूरच्या जिल्हाधिकारी वासुमना पंत यांच्या हस्ते हा धनादेश सुपूर्द करण्यात आला. वाढदिवसानिमित्त कोणताही अनावश्यक गाजावाजा न करता समाजोपयोगी कार्याला प्राधान्य देण्याचा निर्णय अश्विनीताई यांनी घेतला. त्यांच्या या उपक्रमातून सामाजिक बांधिलकी आणि संकटात सापडलेल्या शेतकऱ्यांप्रती संवेदनशीलता दिसून येते.

शेतकऱ्यांच्या मदतीसाठी पुढाकार

दुष्काळ आणि अतिवृष्टीसारख्या नैसर्गिक संकटांमुळे शेतकऱ्यांना आर्थिक अडचणींचा सामना करावा लागतो. अशा कठीण परिस्थितीत शेतकऱ्यांना मदतीचा हात मिळावा, या भावनेतून मुख्यमंत्री सहाय्यता निधीस आर्थिक मदत देण्याचा निर्णय घेण्यात आला. वाढदिवस साजरा करण्यासाठी होणारा खर्च टाळून तो समाजातील गरजू घटकांच्या मदतीसाठी वापरण्याची ही भूमिका विशेष लक्षवेधी ठरली आहे.

‘ *बॅनरबाजीपेक्षा समाजासाठी योगदान महत्त्वाचे’* 

“माझा वाढदिवस हा केवळ आनंद साजरा करण्याचा दिवस नसून समाजासाठी काहीतरी करण्याची संधी आहे. शेतकरी जगला तरच समाजाची घडी मजबूत राहील. त्यामुळे बॅनरबाजी आणि अनावश्यक खर्चापेक्षा संकटात असलेल्या शेतकऱ्यांच्या मदतीसाठी हातभार लावणे मला अधिक महत्त्वाचे वाटते,” अशी भावना नगरसेविका सौ. अश्विनीताई रुपेश निकोडे यांनी व्यक्त केली.

यावेळी रुपेश निकोडे आणि त्यांचा मित्रपरिवार उपस्थित होता. वाढदिवसाच्या निमित्ताने मुख्यमंत्री सहाय्यता निधीला दिलेल्या २१ हजार रुपयांच्या योगदानातून अश्विनीताई निकोडे यांनी सामाजिक उत्तरदायित्वाचा संदेश दिला आहे. वैयक्तिक आनंदासोबत समाजाप्रती असलेले कर्तव्य जपण्याचा त्यांचा हा उपक्रम लोकप्रतिनिधींसह जनतेलाही विचार करायला लावणारा आहे.
✍️✍️✍️✍️✍️
संपादक 
रवी वाळके 
दे दणका न्यूज मुल
👇👇👇👇👇👇
 जाहिरात  व बातम्या करीता संपर्क 
मो,9552358222