रवि वाळके/दे दणका न्यूज मूल
मूल रेल्वे स्थानकावर प्रस्तावित मालधक्का उभारण्याच्या हालचालींनी शहरात चिंतेचे वातावरण निर्माण झाले असून, या विरोधात आता नागरिकांनी थेट आंदोलनाचा मार्ग स्वीकारला आहे. सुरजागड येथील लोहखनिजाची देशभर वाहतूक करण्यासाठी हा मालधक्का उभारला जाणार असल्याची माहिती समोर येताच “मूल शहर बचाव संघर्ष समिती”ने मालधक्का हटाव मोहीम सुरू केली आहे.
शहर प्रदूषणमुक्त ठेवण्यासाठी सर्व नागरिकांनी एकजूट दाखवून या आंदोलनात सहभागी व्हावे, असे आवाहन समितीने केले आहे.
राजकीय पाठबळाचे आरोप, नागरिक संतप्त
मूल येथील शासकीय विश्रामगृहात आयोजित पत्रकार परिषदेत शहरातील प्रतिष्ठित नागरिकांनी या योजनेवर तीव्र आक्षेप नोंदवला. काही राजकीय नेत्यांच्या मदतीने ही योजना रेटली जात असल्याचा आरोप करण्यात आला.
स्थानिकांना रोजगाराचे आमिष दाखवून दिशाभूल केली जात असून, प्रत्यक्षात काही मोजक्या स्वार्थी घटकांनाच याचा फायदा होणार असल्याचा आरोपही यावेळी करण्यात आला.
प्रदूषणाचा गंभीर धोका
प्रस्तावित मालधक्क्यामुळे मूल शहराला जल, वायू आणि ध्वनी प्रदूषणाचा मोठा फटका बसणार असल्याची भीती व्यक्त करण्यात आली.
आजपर्यंत स्वच्छ आणि विकसित शहर म्हणून ओळख असलेले मूल, या प्रकल्पामुळे प्रदूषित शहर म्हणून ओळखले जाईल, असा इशारा नागरिकांनी दिला.
दररोज 800 हायवा – अपघातांचे संकट
या प्रकल्पामुळे दररोज 700 ते 800 अवजड (हायवा) वाहनांची ये-जा होणार असल्याने शहरात अपघातांचे प्रमाण वाढण्याची शक्यता वर्तवण्यात आली आहे.
लोहखनिज वाहतुकीदरम्यान उडणारी धूळ आणि रासायनिक घटक हवेत मिसळून संपूर्ण परिसर लालसर होण्याची शक्यता असून, याचा थेट परिणाम नागरिकांच्या आरोग्यावर होणार आहे.
शैक्षणिक व सामाजिक जीवन धोक्यात
मालधक्क्याच्या लगतच असलेल्या कर्मवीर महाविद्यालयाच्या सार्वजनिक मैदानावर दररोज व्यायाम, क्रीडा आणि सामाजिक कार्यक्रम होतात. या प्रकल्पामुळे हे सर्व उपक्रम बाधित होणार असल्याची भीती व्यक्त करण्यात आली.
तसेच नवभारत विद्यालय, नवभारत कन्या विद्यालय, नवभारत कनिष्ठ विज्ञान महाविद्यालय, कर्मवीर महाविद्यालय आणि पंचायत राज प्रशिक्षण केंद्र यांसारख्या महत्त्वाच्या शैक्षणिक संस्थांवरही याचा विपरीत परिणाम होणार असल्याचे सांगण्यात आले.
वन्यजीवांनाही धोका
हा प्रस्तावित मालधक्का ताडोबा-अंधारी व्याघ्र प्रकल्पाच्या बफर झोनलगत असल्याने वाघ, अस्वल, बिबट यांसारख्या वन्यजीवांच्या स्थलांतर मार्गावर परिणाम होण्याची शक्यता आहे. यामुळे मानव-वन्यजीव संघर्ष वाढण्याचा धोका व्यक्त करण्यात आला.
आंदोलनाचा इशारा
मूल शहरातून सुरजागड लोहखनिज वाहतुकीसाठी प्रस्तावित मालधक्का तात्काळ रद्द करावा, अशी ठाम मागणी “मूल शहर बचाव संघर्ष समिती”ने केली आहे.
अन्यथा, तीव्र स्वरूपाचे आंदोलन छेडण्यात येईल, असा स्पष्ट इशारा देण्यात आला.
या पत्रकार परिषदेला समितीचे पदाधिकारी, सदस्य आणि मोठ्या संख्येने नागरिक उपस्थित होते.
✍️✍️✍️✍️✍️✍️
संपादक
रवी वाळके
दे दणका न्यूज मुल
👇👇👇👇👇
जाहिरात व बातम्या करीता संपर्क करा
मोबा,9552358222
